Monday, December 31, 2012

2013

രണ്ടായിരത്തിപ്പതിമൂന്നു കൊല്ല-
മുണ്ടായിപോല്‍  കൃസ്തു മരിച്ചശേഷം
കൊണ്ടാടുവാനെന്തതിലിത്ര, മദ്യം
വേണ്ടാത്ത മര്‍ത്ത്യര്‍ക്കു, മതേതരര്‍ക്കും?

Thursday, December 6, 2012

ഉത്തിഷ് o ഭാരത!

ഉത്തിഷ് o  ഭാരത!

രാമകാര്യം നേടുവാനായ്  പോകയാണീ  മാരുതി!
ആഴിതാണ്ടും ; അചലമേറ്റും ; അജിതനാണീ  മാരുതി !
 ഭരതഭൂവിന്‍ മണ്ണിനോരോ തരിയുമോതീടുന്നിതാ 
രാമരാം ശ്രീരാമരാം ജയ രാമരാം രഘുരാമരാം !

അമരമിബ്ഭുവി ഞാന്‍ പിറന്നത്‌  പരമശിവസംപ്രീതിയാല്‍ 
സമരവീര്യമതെന്നിലുള്ളത് രാമകാര്യം നേടുവാന്‍ 
അറിവിനഞ്ജനമെഴുതിയെന്മിഴി മിഹിരനാലുന്മീലിതം 
പവനനേകിയ വേഗവും ഭുജബലവുമുലകില്‍ കീര്‍ത്തിതം 

അലസതക്കിനി വല വിരിക്കാന്‍ മനസി ഞാനേകില്ലിടം 
അല യൊടുങ്ങാക്കടലിനില്ലെന്‍ വഴിമുടക്കാന്‍ പാടവം 
അറിവു ഞാനി, ന്നുലകിലില്ലൊരു ബലവുമെന്നെ  തടയുവാന്‍ 
അമരഭാരത ഭൂമിതന്‍ മക,നമരനാണീ  മാരുതി!

"കര്മ്മകുശലത യോഗമല്ലോ ധര്മ്മവിമുഖത പാപവും 
കാമ്യ മല്ലോ ധര്‍മ്മമാര്‍ഗംതന്നില്‍ ജീവത്യാഗവും"
പാര്‍ത്ഥ സാരഥി യോതിടു മ്പോള്‍ പാഞ്ചജന്യമു യര്‍ന്നിടുമ്പോള്‍ 
ഭാരതത്തിന്‍ തേരില്‍ ഭഗവദ്ധ്വജമുയര്‍ത്തീടേണ്ടവന്‍    ഞാന്‍  !

രാമകാര്യം നേടുവാനായ്  പോകയാണീ  മാരുതി!
ആഴി താണ്ടും ; അചല മേ റ്റും ; അജിതനാ ണീ  മാരുതി !
 ഭരതഭൂവിന്‍ മണ്ണി നോരോ തരിയുമോതീടുന്നിതാ 
രാമരാം ശ്രീ രാമരാം ജയ രാമരാം രഘുരാമരാം !