ഒന്നും ഒന്നും

ഒന്നും ഒന്നും

ഗണിതം പഠിച്ചുതുടങ്ങി ഞാ, നെന്തിനും

തെളിവുതേടി; കണ്ടതെന്തെന്നോ?

രണ്ടിനൊന്നേ തെളി,വൊന്നിനു ഞാൻ തെളി,-

വൊന്നിനും പൂജ്യം തെളിവല്ല!

ബൌദ്ധനോടോതിയിതാചാര്യൻ; (ലഘു-

ബുദ്ധികൾക്കുള്ളതല്ലദ്വൈതം!)

എണ്ണം പഠിച്ചിട്ടുമെത്ര പഠിച്ചിട്ടു-

മെണ്ണിയതെന്തെന്നറിഞ്ഞില്ല!

(കൈവിരലല്ല, കല്ലല്ല, കടമല്ല

കണ്മുമ്പിലുള്ളവയൊന്നുമല്ല...)

എണ്ണിയാൽ തീരാത്തതെന്തുകൊണ്ടോ?

എണ്ണിയതെന്നെയാണെന്നതാണോ?

എണ്ണിയതുണ്മയെത്തന്നെയാണോ?

എങ്കിലതൊന്നിലധികമുണ്ടോ?

ഒന്നിൽ കുറവായൊരുൺമയുണ്ടോ?

(ബുദ്ധനന്നെണ്ണം പിഴച്ചതാവാം!)